تبسيمة الغدر
محيني من تبسيمة الغدر
من ريحة تغربت
في يد الشك
تزرعت جروح في عين الغبوشية
محيني…..
من تنهيدة حايلة
ف صدر صرخة مشقوقة
مخنوقة
خنقت الداوي فيا
قطعت حبالو
و لاقتني عنوة باوجاعي
لاَقتْ فيا جوايهي
محايني…
ونساتني شهقة
سبلت ففراش الريح
وكَلت
نكفف جلايل أحزاني
حتى كلما سرح لسان الفرح
ف كفوف لوقات
تولدت الحيرة ف عش السؤال
الميعاد اعمى
معتاكف فسواق خيالي
ونحل هبالي
معمر جباحو
كفكفت دموع سكاتي
ؤكمكمت الحاتل فكراع ترابي
راه انا لي درت بحساب جروحك
وانت خوفك
تهبى جمار ضري الكايدة
محيني من وجه غرابك
وخليني نسيل عسل
من جبوح مرايتي
يكبر تيلاد أحلامي
ؤيشعشع ف صباحو
نكتب حكايتي على ظهر
الباقي من أيامي
نشوفني كيف بغيت
وكيف خاطري كان ناوي
يتلاقى وجهي مع وجهي
يتزعزع فيا انا
يزكنن لغايا
والمخزون ف جوف الروح
يتبعت ضاوي
تخضار افراحي الصايمة
ؤ ننبت أوراق حنا(ء)
على شفار قماري
*شاعرة وزجالة
